6 mart 2023-cü il tarixində Ailə, Qadın və
Uşaq Problemləri üzrə Dövlət Komitəsinin təşkilatçılığı ilə 8 Mart Beynəlxalq
Qadınlar Gününə həsr olunmuş tədbir keçirilib.
Tədbirdən öncə Fəxri xiyaban ziyarət edilərək, Azərbaycan xalqının
Ümummilli lideri Heydər Əliyevin və görkəmli oftalmoloq alim Zərifə Əliyevanın
xatirəsinə dərin ehtiram ifadə olunub, məzarı önünə gül dəstələri düzülüb.
Azərbaycan Respublikasının Dövlət Himni səsləndirildikdən sonra
tədbir başlayıb. Davamında Ulu Öndər Heydər Əliyevin Azərbaycanın inkişafına
verdiyi töhfələrdən və dövlət siyasətindən bəhs edən film nümayiş olunub.
Tədbir Azərbaycan Respublikası Prezidenti Administrasiyasının
Humanitar siyasət, diaspor, multikulturalizm və dini məsələlər şöbəsinin müdiri
Fərəh Əliyevanın Prezident cənab İlham Əliyevin qadınlara təbrik məktubunu
səsləndirməsi ilə davam edib.
Açılış nitqi ilə çıxış edən Ailə, Qadın və Uşaq Problemləri üzrə
Dövlət Komitəsinin sədri Bahar Muradova bugünkü tədbirin Ulu öndər Heydər
Əliyevin 100 illiyinə həsr edildiyini bildirərək, onun Azərbaycan dövləti və
xalqı üçün fədakarlığından bəhs edib, bütün həyatını, bilik və bacarığını
Azərbaycan xalqına həsr etdiyini söyləyib. Dahi şəxsiyyətin müstəqil
dövlətimizin quruculuğu yolunda göstərdiyi qəhrəmanlıq və fədakarlıq qarşısında
hər zaman ehtiramla yad edildiyini və hər kəsin qəlbində minnətdarlıq hissi ilə
yaşadığını vurğulayıb.
O, Heydər Əliyevin qoyduğu ənənənin bu gün də davam etdirildiyini
və qadınlarımızı ilk cənab Prezidentin təbrik etdiyini diqqətə çatdırıb.
Bildirib ki, hər il ölkə başçısının Sərəncamı ilə qadınların təltif edilməsi
onları gələcəyə ruhlandıran addımdır və Azərbaycanın həyatında oynadığı rola,
bütövlükdə insanlığın həyatındakı roluna verilən dəyərdir.
B. Muradova qeyd edib ki, biz qəhrəmanlıq səlnaməsi yazan
igidlərimizin şücaəti, Ali Baş Komandanın yüksək təşkilatçılıq və bənzərsiz
sərkərdəlik məharətinin nəticəsi olan Zəfərdən sonrakı günləri yaşayırıq və bu
günlərin hər anı qəhrəmanlıq hissləri ilə doludur: “Böyütdüyümüz, boya-başa
çatdırdığımız oğulları, qızları bu torpaq uğrunda qurban verməyimiz həm də
Azərbaycan qadınlarının qəhrəmanlığıdır, fədakarlığıdır. Bu baxımdan bizim bir
üzümüz kədər, bir üzümüz sevinc doludur. Son hadisələr də onu göstərir ki, bu
müqəddəs torpağın azadlığı, dirçəlişi və intibahı üçün qurbanlar verməkdə davam
edirik. Amma bu, bizi ruhdan salmamalı, qarşıda dayanan hədəflərə doğru bir
vətəndaş olaraq, azərbaycanlı olaraq xidmət etməkdə davam etməliyik”.
O, ölkə prezidentinin Qərbi Azərbaycana Qayıdış Konsepsiyasının
hazırlanması üçün tapşırıq verdiyini xatırladıraraq, Qərbi Azərbaycan icmasının
yaradıldığını və geniş bir şəkildə əhalinin müxtəlif təbəqələri ilə, həmçinin
beynəlxalq aləmlə işlərin aparıldığını qeyd edib: “Bizim qarşımızda dayanan ən
böyük hədəflərimizdən biri Qarabağa qayıtdığımız kimi, Qərbi Azərbaycana da
qayıtmaqdır. Bu məqsəd bizim ən ülvi məqsədimizdir”.
B. Muradova əlavə edib ki, Konstitusiyamızın, qanunlarımızın,
dövlətimizin bizə qazandırdığı üstünlüklərdən istifadə edərək, bundan sonra da
Azərbaycan üçün faydalı olmağa çalışmalı, bu torpağın hər bir nöqtəsində
sülhün, əmin-amanlığın, təhlükəsizliyin təmin olunmasına öz töhfəmizi
verməliyik.
Çıxışının sonunda Bahar Muradova il ərzində fəaliyyəti ilə
fərqlənən, eyni zamanda siyasi sahədə seçilən qadınların uğur sevincini
bölüşüb. O, xalqa xidmət, fədakarlıq və xeyirxahlıq simvolu olan xanım Mehriban
Əliyevanın açdığı yolu uğurla getməyə hazır olduğumuzu bəyan edib və başda
Birinci vitse-prezident olmaqla bütün qadınları təbrik edib.
Daha sonra Azərbaycan qadınlarının “Tərəqqi” medalı ilə təltif
edilməsi haqqında Azərbaycan Respublikası Prezidentinin Sərəncamı ilə
mükafatlandırılan qadınlar təbrik edilib.
Təltif edilən Nübarək Hüseynova Ağdam rayonundan məcburi köçkün
olan qadınların adından çıxış edərək onların işğaldan azad edilən
torpaqlarımıza güclü və inkişaf etmiş vətəndaşlar kimi qayıdacaqlarını qeyd
edib. İradə Rzazadə cənab Prezidentin göstərdiyi etimadı doğruldaraq, əhalinin
Qərbi Azərbaycana qayıdış prosesinə töhfə verməyə çalışacaqlarını bildirib.
Ulu Öndər Heydər Əliyevlə çiyin-çiyinə çalışan, görkəmli ictimai
xadimlərin adları qeyd olunub.
Tədbir bədii proqram ilə davam edib.
